Écoutez le conte : Sahelikungo bɛna segin ka nugu kura ye don min

Finyè kunkan lamèn : saheli de bè ka kasi. A bè ka môgô laadiri ani môgô nyuman de dôrôn makônô, min bèna a nugu kura ye.

Finyè kunkan lamèn : saheli de bè ka kasi. Ko ale b’a fè ka nugu kura ye.

Saheli badaabadaa tun tè sahelikungo ye : dugu duman tun don, dugu min jiriw tun nugulen don.

A dugudenw tun bè kungokolo bonyè. Wa u tun bè balo hèrè ani baden na fana ɲôgôn kèrèfè. U tun bè donsoya kè ani baganmara ani cikè.

U tun b’u ka dugu fè. Wa u ka dugu yèrè fana tun b’u fè.

Hadamaden natabatigiw ka nali kèra sababu ye, bônè k’i cooko dugu in na.

O môgô ninnu ka nyinifènw tun tè hèrè ye, fô nafolomafènw dôrôn.

Fosi tun tè u nimisi wasa, tuma bèè u ni nege kura tun bè nyôgôn na.

Balo ɲini siratigè la, n’u tun taara donsoya kè yôrô la, u tun tè dan kungokônôsogow fagali dôrôn ma. U tun b’u fagali kɛ ni nyôgôn dan ye, yasa k’a jira nyôgôn na ko : n tègè ka di n’i ta ye.

Wa, u tun bè kungo kônô jiriw fana bilakojugu tigè o cogo kelen na. U tun tè dan jiri ninnu tigɛli ma, u nafa dôrôn kosɔn. Nka u tun bè u bilakojugu tigè nin k’u kè, u ka dakabanasow jolilan ye.

Nin hadamaden ninnu ka natabayawalew kèra gasiba ye saheli ma, min y’a tôôrô kosèbè.

Fô a ye nganiya siri ko ale bèna kè sahelikungo ye.

Nka o bèè la, dugudenw tora yen, barisa yen kanu tun b’u la.

O bonya in ma tô to saheli la. Yasa ka dugudenw ka kanu bonya lasegin u ma, a ye u sôn dalaba damadôw la ani bajoliba bolofara caman.

Nka kabini o waati jan in, a dusukun kamikaminen tora.

Finyè kunkan lamèn: saheli de bè kasi la. Ko ale b’a fè ka nugu kura ye.

Don dô, a ye kondônnaba dô nyininka ko, yala lawale la, siginyôgônya bènnen min tun bè sahelikungo ni hadamadenw ni nyôgôn cè, o nyôgônna bè se ka lawaleya cogo jumèn na bi?

Kodônnaba in ko a ma: “Jènyôgônya nyini môgô tilennenw ani môgô laadiriw fè, môgô minnu bè kungokolo gasi to”.

A tilara k’a fô a ye k’a fara a kan ko: “Don dô, cè dô bè na. Jiriw ni binw minnu tun bè falen yan kabini lawalewaati, ale ka lanyini ye ka olu bèè lanyènamaya. O cè in, môgô laadiri ani môgô ɲuman don ! Ale kèlen don k’a ka hadamadenya bèn jirikow nyènyinini ma. Nka yasa ka se ka lawale hèrè ni a nèèma nyôgônna lanati kura ye, fô a ka se sôrô hadamaden natabaatigi ninnu kan.

A bè gèlèya kosèbè. Nka baarakènyôgôn nyuman dô bèna a dèmè yasa a ka se sôrô gèlèya ninnu kan ani ka dankari kɛ a jugu ninnu ka walew la. O cè kofôlen in, kungokônô jiridenkisèw b’a bolo minnu bèna kè sababu ye k’i nugu kura ye.

Finyè kunkan lamèn : saheli de bè ka kasi. A bè ka môgô laadiri ani môgô nyuman de dôrôn makônô, min bèna a nugu kura ye.

N’an ye kungokolo bonyali kè an ka walew ye, a kanu bè bonya an dusukun na badaabadaa, wa waati surunnin yèrè kônô, sahelikungo na nugu kura ye.